Prokurori i çështjes Platini Aliçka është dorëhequr nga dosja e vrasjes së mjekut Pjerin Xhuvani.
Këtij të fundit iu mor jeta prej fishekut të pistoletës së shkrepur nga Arbër Papleka në Elbasan, 4 ditë para zgjedhjeve të 25 prillit 2021.
Shkak i dorëheqjes mendohet të kenë qenë arsyet shëndetësore.
Dorëheqja e prokurorit ka ardhur pas përfundimit të hetimeve, ku çështja është në gjykim nga Gjykata Elbasan.
Në fllim të tetorit, Gjykata e Elbasanit vendosi të kalojë për gjykim penal të zakonshëm çështjen ndaj Arbër Paplekajt, i akuzuar për vrasjen e Pjerin Xhuvanit pak ditë para zgjedhjeve të përgjithshme parlamentare të 25 prillit.
Gjykata la në fuqi masat e sigurisë “arrest me burg” për Paplekajn dhe “arrest shtëpie” për dy ish nëndrejtorët e policisë, Niko Palla dhe Albert Nushi.
Ajo ishte seanca e shtatë gjyqësore që zhvillohej për Paplekajn, për të vendosur nëse çështja ndaj tij do të gjykohej nga themeli apo me procedurë të zakonshme.
Kujtojmë që avokati i Arbër Paplekaj kishte kërkuar që ndaj klientit të tij të ngrihej akuza “Vrasje në kushtet e vetëmbrojtjes” dhe jo siç e akuzon prokuroria për “vrasje në rrethana cilësuese”.
